مودی نے پاکستانی فضائی حدود استعمال کی، مگر خیرسگالی کا پیغام دینا گوارا نہ کیا -

لاہور:
بھارتی وزیر اعظم نریندر مودی سفارتی آداب بھول گئے، پاکستانی فضائی حدود استعمال کی مگر خیر سگالی کا کوئی پیغام نہیں دیا۔

ایوی ایشن ذرائع کے مطابق، بھارتی وزیر اعظم نریندر مودی نے فرانس کے دورے کے دوران پاکستان کی فضائی حدود استعمال کی۔ دہلی سے پیرس جاتے ہوئے ان کا خصوصی طیارہ “انڈیا ون” لاہور کی فضائی حدود سے گزرا۔ عالمی ایوی ایشن قوانین کے تحت کسی بھی ملک کی فضائی حدود کو استعمال کیا جا سکتا ہے، تاہم سفارتی روایات کے مطابق ایسے مواقع پر خیر سگالی کے پیغامات دیے جاتے ہیں، جو اس بار بھی نظر انداز کر دیے گئے۔

ذرائع کے مطابق، نریندر مودی نے اپنے تین روزہ دورۂ فرانس کے لیے پاکستانی فضائی حدود سے سفر کیا۔ مودی کا خصوصی طیارہ لاہور کے قریب پاکستانی فضائی حدود میں داخل ہوا اور شیخوپورہ، حافظ آباد، چکوال اور کوہاٹ کے اوپر 34 ہزار فٹ کی بلندی پر پرواز کرتا رہا۔ بھارتی ایئر فورس کے بوئنگ 777 طیارے نے پاراچنار سے افغان فضائی حدود میں داخل ہو کر سفر جاری رکھا۔

ذرائع کا کہنا ہے کہ مودی کے طیارے نے تقریباً 41 منٹ تک پاکستانی فضائی حدود میں پرواز کی۔ واضح رہے کہ افغانستان کی فضائی حدود عام پروازوں کے لیے بند ہے، تاہم بھارتی وزیر اعظم کو خصوصی اجازت دی جاتی ہے۔