کامران اکمل کی اہلیہ کا انکشاف: "یہ مجھے بالکل بھی پسند نہیں تھے -

سابق کرکٹر کامران اکمل اور ان کی اہلیہ عائزہ الیاس نے اے آر وائی ڈیجیٹل کے پروگرام ‘شان سحور’ میں شرکت کی، جہاں انہوں نے اپنی شادی اور رشتے سے متعلق دلچسپ انکشافات کیے۔

کامران اکمل نے بتایا کہ جب شادی کی بات چلی تو وہ خوش نہیں تھے۔ انہوں نے کہا:
“ویسٹ انڈیز کے ٹور سے واپس آیا تو گھر والوں نے کہا کہ شادی کرنی ہے، میں نے کہا ابھی کیوں؟ مجھے کھیلنا ہے اور ان چکروں میں نہیں پڑنا۔”
انہوں نے مزید کہا کہ وہ ایک ہفتے تک ناراض رہے اور والدین سے کافی بات چیت کی، مگر جب اہلیہ سے ملاقات ہوئی تو فیصلہ کر لیا کہ اب شادی کرنی ہے۔

عائزہ الیاس کی دلچسپ کہانی
عائزہ الیاس نے بتایا کہ ان کی ارینجڈ میرج ہوئی۔ ان کے دیور عمر اکمل، ان کے چھوٹے بھائی کے دوست تھے اور دونوں کرکٹ کھیلتے تھے۔ جب ان کے بھائی کا ایکسیڈنٹ ہوا تو عمر اکمل کے والد ان کی عیادت کے لیے آئے، پھر وہ اپنی اہلیہ کو ساتھ لے کر آئے اور رشتہ طے پا گیا۔

انہوں نے مزید انکشاف کیا کہ کامران اکمل کو پہلی بار اسکول میں مہمان خصوصی کے طور پر دیکھا تھا، لیکن انہیں پسند نہیں آیا۔ انہوں نے کہا:
“عمر کہنے لگا کہ وکٹ کیپر آیا ہے، میں نے کہا مجھے تو معین خان پسند ہے!”

عائزہ نے کہا کہ اس وقت انہیں رشتے کا کوئی اندازہ نہیں تھا، مگر عمر اور ان کے بھائی کے ذہن میں کچھ اور ہی چل رہا تھا، جس کے بعد انہوں نے والدین سے بات کی۔

کرکٹر سے شادی کیوں نہیں کرنا چاہتی تھیں؟
عائزہ الیاس نے بتایا کہ جب ان کے والدین نے شادی کا فیصلہ کیا تو وہ بھی راضی نہیں تھیں۔
“مجھے پڑھنا تھا اور میں کسی کرکٹر سے شادی کرنا ہی نہیں چاہتی تھی، کیونکہ ان کی گلیمرس لائف اور فین فالوونگ کی وجہ سے میں ہچکچا رہی تھی۔”