اسلام آباد: جوڈیشل کمپلیکس حملہ کیس میں پی ٹی آئی کے رہنما مراد سعید، حماد اظہر اور فرخ حبیب کو اشتہاری قرار دے دیا گیا۔
تفصیلات کے مطابق، انسدادِ دہشت گردی عدالت میں پی ٹی آئی رہنماؤں کے خلاف جوڈیشل کمپلیکس حملہ کیس کی سماعت ہوئی۔ انسدادِ دہشت گردی عدالت کے جج طاہر عباس سپرا نے کیس کی سماعت کی اور مسلسل غیر حاضری پر مراد سعید، حماد اظہر اور فرخ حبیب کو اشتہاری قرار دے دیا۔
عدالت نے واثق قیوم عباسی، راجہ بشارت سمیت دیگر غیر حاضر ملزمان کے وارنٹ گرفتاری بھی جاری کر دیے۔
پیش ہونے والے ملزمان کی حاضری کے بعد عدالت نے کیس کی سماعت 7 اپریل تک ملتوی کر دی۔ پی ٹی آئی رہنماؤں کے خلاف تھانہ رمنا میں دو مقدمات درج ہیں۔
جوڈیشل کمپلیکس میں ہنگامہ آرائی
یاد رہے کہ بانی پی ٹی آئی کی توشہ خانہ کیس میں جوڈیشل کمپلیکس میں پیشی کے موقع پر شدید ہنگامہ آرائی ہوئی تھی، جس میں پولیس اور کارکنان کے درمیان جھڑپیں ہوئیں، جلاؤ گھیراؤ اور توڑ پھوڑ کے باعث صورتحال کشیدہ ہو گئی تھی۔
پولیس ترجمان کے مطابق، مشتعل مظاہرین نے 25 سے زائد موٹرسائیکلیں اور گاڑیاں نذرِ آتش کر دیں، پولیس چوکی اور درختوں کو بھی آگ لگا دی گئی۔ اس دوران، اسلام آباد پولیس کی دو گاڑیاں اور بم ڈسپوزل اسکواڈ کی گاڑی بھی جلائی گئی۔
Leave a Reply