امریکی صدر ڈونلڈ ٹرمپ کی جانب سے کانگریس کے مشترکہ اجلاس سے خطاب کے دوران دہشت گردی کے خلاف پاکستان کی کاوشوں کی تعریف کے بعد سوشل میڈیا پر تبصروں کا طوفان آ گیا، جہاں مختلف آراء دیکھنے کو ملیں۔
صدر ٹرمپ نے جمعرات کو اپنے خطاب میں 2021 میں افغانستان سے امریکی انخلا کو “تباہ کن اور نااہلانہ فیصلہ” قرار دیتے ہوئے کہا کہ کابل ایئرپورٹ پر خودکش حملے میں 13 امریکی فوجیوں کی ہلاکت امریکی تاریخ کا “سب سے شرمناک لمحہ” تھا۔
انہوں نے اپنے خطاب میں اعلان کیا، “میری انتظامیہ نے اس بھیانک حملے کے مرکزی دہشت گرد کو گرفتار کر لیا ہے، اور وہ اس وقت امریکا آ رہا ہے تاکہ امریکی انصاف کا سامنا کرے۔”
پاکستان نے امریکا کو داعش کے انتہائی مطلوب کمانڈر کی گرفتاری میں کیسے مدد دی؟
صدر ٹرمپ نے پاکستان کی حکومت کا شکریہ ادا کرتے ہوئے کہا کہ انہوں نے اس “درندے” کی گرفتاری میں امریکا کی مدد کی۔ اس بیان پر ایوان میں زبردست تالیاں بجائی گئیں۔
جہاں امریکی ایوان میں اس اعلان پر تالیاں بجیں، وہیں پاکستان میں بھی اس بیان کو بھرپور پذیرائی ملی۔ وزیراعظم شہباز شریف نے ٹرمپ کے بیان کا خیر مقدم کیا۔
سوشل میڈیا پر شدید ردعمل
ٹرمپ کا یہ بیان سوشل میڈیا پر خوب وائرل ہوا، خاص طور پر پی ٹی آئی مخالف پاکستانیوں نے اسے بھرپور طریقے سے شیئر کیا۔
ایک بھارتی “ایکس” صارف نے تبصرہ کرتے ہوئے لکھا، “ٹرمپ نے دہشت گردی کے مشتبہ ملزم کی گرفتاری میں تعاون پر پاکستان کا شکریہ ادا کیا، جبکہ امریکی گاڑیوں پر محصولات کے معاملے پر بھارت کو تنقید کا نشانہ بنایا۔”
فواد رحمان نامی ایک صارف نے تبصرہ کیا، “صدر ٹرمپ نے اپنے پہلے مشترکہ خطاب میں پاکستان کا شکریہ ادا کیا۔ یہ پی ٹی آئی امریکہ اور عمران خان کے لیے تباہ کن خبر ہے—رہائی کے لیے جمع کیے گئے لاکھوں ڈالر ضائع ہو گئے۔ ٹرمپ کے الفاظ امریکی مؤقف میں بڑی تبدیلی کا اشارہ دے رہے ہیں، جو ان کے مقصد کے لیے بڑا دھچکا ہے۔”
اسی طرح حفصہ ملک نے لکھا، “پاکستان اور امریکا تمام دہشت گردوں کو واضح پیغام دے رہے ہیں کہ زمین پر تمہارے لیے کوئی جائے پناہ نہیں۔”
پی ٹی آئی کو شدید تنقید کا سامنا
پی ٹی آئی کو تنقید کا نشانہ بناتے ہوئے ایک صارف نے لکھا، “تمہارا لابنگ پر خرچ کیا گیا پیسہ ضائع ہو گیا۔ ریاستیں ریاستوں سے معاملات کرتی ہیں—کوئی فرد یا شخص خود ریاست نہیں ہوتا۔”
سوشل میڈیا صارف “ای این ٹی ای آئی” نے طنزیہ انداز میں کہا، “میری تعزیت تمام پی ٹی آئی کے اوورسیز مسخروں سے ہے۔”
اس صارف نے شہباز گل، زلفی بخاری، عادل راجہ، جبران الیاس، وجاہت خان، قاسم سوری، اظہر مشوانی اور دیگر کو ٹیگ کرتے ہوئے لکھا، “تم لوگوں نے سوچا تھا کہ سوشل میڈیا پر مسخرہ پن کچھ حاصل کروا دے گا؟ لو، تمہارے ‘ابو’ خود ‘حکومتِ پاکستان’ کا شکریہ ادا کر رہے ہیں!”
Leave a Reply