وسیم اکرم نے رمیز راجا کو آڑے ہاتھوں لے لیا -

قومی ٹیم کے سابق کپتان اور سوئنگ کے سلطان وسیم اکرم نے سابق کرکٹر اور چیئرمین پی سی بی رمیز راجا کو بھی نہ بخشا۔ اس سے قبل وہ مشتاق احمد پر بھی تنقید کر چکے تھے۔

آئی سی سی چیمپئنز ٹرافی میں قومی ٹیم کی ناقص کارکردگی اور گروپ اسٹیج میں ہی باہر ہونے پر وسیم اکرم کا غصہ ابھی تک ٹھنڈا نہیں ہوا۔ دو روز قبل انہوں نے کھلاڑیوں کے کیلے کھانے پر طنز کیا تھا، اور یہاں تک کہا کہ اگر عمران خان ان کے کپتان ہوتے تو انہیں مارتے۔

وسیم اکرم کا رمیز راجا پر طنز

گزشتہ روز وسیم اکرم کے پروگرام کی ایک ویڈیو وائرل ہوئی، جس میں وہ دیگر کرکٹرز کے ساتھ گفتگو کر رہے تھے۔ اس پینل میں وقار یونس اور بھارتی کرکٹر اجے جڈیجا بھی شامل تھے۔

وسیم اکرم نے رمیز راجا کے اس بیان کا مذاق بنایا، جس میں انہوں نے دعویٰ کیا تھا کہ پرتگالی فٹبالر کرسٹیانو رونالڈو کا ڈائٹ پلان نیشنل ایروناٹکس اینڈ اسپیس ایڈمنسٹریشن (ناسا) کے سائنسدانوں نے تیار کیا ہے۔ اس بیان پر رمیز راجا کو دنیا بھر میں تنقید کا سامنا کرنا پڑا تھا۔

شو کے دوران وسیم اکرم نے طنزیہ انداز میں کہا:
“سنا ہے کہ ناسا کرسٹیانو رونالڈو کی خوراک بناتا ہے۔”
اس کے بعد انہوں نے وقار یونس کی طرف اشارہ کیا اور کہا، “وقار جانتا ہے،” جس پر دونوں ہنس پڑے۔

پاکستانی ٹیم پر سخت تنقید

وسیم اکرم نے پروگرام کے دوران قومی ٹیم کی کارکردگی پر بھی سخت تنقید کی۔ ان کا کہنا تھا کہ پاکستانی ٹیم جدید کرکٹ کے دور میں بھی قدیم انداز میں کھیل رہی ہے، جبکہ دیگر ٹیمیں تیز رفتار اور جدید طرز کی کرکٹ اپنا چکی ہیں۔

انہوں نے پاکستانی بولرز کے اعدادوشمار پیش کرتے ہوئے کہا:
“ہمارے بولرز 60 کی اوسط سے 24 وکٹیں لینے میں کامیاب ہوئے ہیں، یعنی 60 رنز پر ایک وکٹ حاصل کر رہے ہیں۔”
انہوں نے مزید کہا کہ پاکستانی ٹیم کی بولنگ اوسط دنیا کی 14 ٹیموں میں 12ویں نمبر پر ہے، یعنی عمان اور امریکا سے بھی خراب۔

وسیم اکرم کی ان باتوں پر شائقین کرکٹ میں شدید بحث چھڑ گئی ہے، اور ان کے تبصروں کو لے کر سوشل میڈیا پر ملا جلا ردِعمل دیکھنے کو مل رہا ہے۔