کراچی کے علاقے کلفٹن، بوٹ بیسن میں شہریوں پر تشدد کے واقعے میں ملوث شاہ زین مری کے چار ذاتی محافظوں سمیت سات گارڈز کو گرفتار کرلیا گیا۔
پولیس کی کارروائی
اے آر وائی نیوز کی رپورٹ کے بعد پولیس نے فوری کارروائی کرتے ہوئے 7 ملزمان کو حراست میں لے لیا۔ ڈی آئی جی ساؤتھ اسد رضا کے مطابق گرفتار شدگان میں شاہ زین مری کے چار ذاتی محافظ بھی شامل ہیں۔
اسد رضا نے مزید بتایا کہ پولیس نے دو مختلف مقامات پر چھاپے مار کر گارڈز کو گرفتار کیا اور ان کے قبضے سے اسلحہ برآمد کرلیا۔ برآمد شدہ اسلحے کے لائسنس کی جانچ پڑتال کی جا رہی ہے۔
مرکزی ملزم بلوچستان فرار
گرفتار گارڈز میں غوث بخش، جلاد خان، علی زین اور حسن شامل ہیں، جبکہ مرکزی ملزم شاہ زین مری تشدد کے بعد بلوچستان فرار ہوگیا۔ اس کی گرفتاری کے لیے بلوچستان حکومت سے رابطہ کرلیا گیا ہے۔
واقعے کی سی سی ٹی وی فوٹیج
گزشتہ ہفتے کلفٹن بوٹ بیسن کے علاقے میں پیش آنے والے اس واقعے کی سی سی ٹی وی فوٹیج بھی سامنے آئی تھی، جس میں ایک کار کو دوسری گاڑی سے ٹکراتے اور پھر مسلح افراد کو گاڑی میں بیٹھے شہریوں پر تشدد کرتے دیکھا جا سکتا ہے۔
مقدمہ درج
انیس فروری کو پیش آنے والے اس واقعے کا مقدمہ متاثرہ شہری برکت علی سومرو کی مدعیت میں تھانہ بوٹ بیسن میں درج کرلیا گیا تھا۔ مدعی کے مطابق، سادہ لباس افراد نے کھلے عام اسلحے کے زور پر انہیں تشدد کا نشانہ بنایا، جس سے انہیں سر پر شدید چوٹیں آئیں۔ ان کے مطابق، حملہ آور نشے میں تھے۔
متاثرہ شہری کا مطالبہ
متاثرہ شہری نے اے آر وائی نیوز سے گفتگو میں وزیر اعلیٰ سندھ اور وزیر داخلہ سے واقعے میں ملوث تمام ملزمان کی جلد از جلد گرفتاری کا مطالبہ کیا ہے۔
Leave a Reply