بانی پی ٹی آئی نواز شریف نہیں بنیں گے، فواد چوہدری -

اسلام آباد: سابق وزیر فواد چوہدری کا کہنا ہے کہ بانی پی ٹی آئی ایسا کوئی تاثر نہیں دیں گے جس سے وہ نواز شریف بن جائیں۔

تفصیلات کے مطابق، فواد چوہدری نے اے آر وائی نیوز کے پروگرام میں گفتگو کرتے ہوئے کہا کہ پی ٹی آئی کی ہونے والی ملاقاتوں کی تصدیق ہو چکی ہے، لیکن بانی پی ٹی آئی اپنے بیانیے سے پیچھے نہیں ہٹ رہے، اسی وجہ سے بات چیت ناکام ہو رہی ہے۔

سابق وزیر کا کہنا تھا کہ اس میں کوئی شک نہیں کہ بانی پی ٹی آئی ایک مقبول لیڈر ہیں، اور وہ ایسا کوئی تاثر قائم نہیں کرنا چاہتے جس سے ان کا موازنہ نواز شریف سے کیا جائے۔

سیاسی رہنما نے مزید کہا کہ عمران خان کا بیرون ملک جانے کا کوئی ارادہ نہیں، نہ ہی وہ کسی ڈیل کا حصہ بنیں گے۔ وہ اب “آؤٹ آف سلیبس” آ چکے ہیں اور پیچھے ہٹنے کے لیے تیار نہیں۔

انہوں نے کہا کہ حکومت کو بھی خوف ہے کہ اگر عمران خان باہر آگئے تو ان کے لیے مشکلات کھڑی ہو جائیں گی۔ ان کے مطابق، الیکشن کے علاوہ کوئی دوسرا راستہ نہیں، آخر میں انتخابات ہی ہوں گے۔

فواد چوہدری کا کہنا تھا کہ واحد حل یہی ہے کہ بانی پی ٹی آئی سے الیکشن کی تاریخ پر اتفاق کر لیا جائے، کیونکہ بات چیت کے علاوہ کوئی دوسرا راستہ نہیں۔

شہباز شریف سے متعلق سوال کے جواب میں فواد چوہدری نے کہا کہ شہباز شریف کے پاس مذاکرات کے لیے زیادہ گنجائش نہیں، پہلے حکومت کو اسٹیبلشمنٹ سے بات کرنی چاہیے، پھر پی ٹی آئی سے مذاکرات کا سوچنا چاہیے۔ اگر حکومت بانی پی ٹی آئی سے ملاقات کرانے کی پوزیشن میں نہیں تو پھر فیصلہ بھی بانی پی ٹی آئی کو ہی کرنا ہوگا۔