نیوزی لینڈ کے خلاف پاکستان کو تاریخی فتح دلانے والے نوجوان اوپنر حسن نواز پاکستان سپر لیگ (پی ایس ایل) میں کوئٹہ گلیڈی ایٹرز کی نمائندگی کریں گے۔
حسن نواز کو پاکستان سپر لیگ 2025 کے ڈرافٹ میں پی ایس ایل کی سابق چیمپیئن ٹیم کوئٹہ گلیڈی ایٹرز نے اپنے اسکواڈ میں شامل کیا ہے۔ نوجوان بلے باز کو فرنچائز نے ایمرجنگ کیٹیگری میں منتخب کیا تھا اور وہ آئندہ سیزن میں گلیڈی ایٹرز کی جانب سے ایکشن میں نظر آئیں گے۔
اس سے قبل، حسن نواز نے 2023 میں اسلام آباد یونائیٹڈ کی نمائندگی کی تھی، تاہم انہیں صرف 3 میچز کھیلنے کا موقع ملا، جہاں وہ اپنی صلاحیتوں کا بھرپور اظہار کرنے میں کامیاب نہیں ہو سکے۔ انہوں نے 3 میچز میں 100 کے اسٹرائیک ریٹ اور 9.33 کی اوسط سے 28 رنز بنائے تھے۔
یاد رہے کہ حسن نواز نے نیوزی لینڈ کے خلاف تیسرے ٹی20 میچ میں پاکستان کے لیے تیز ترین ٹی20 سنچری بنانے کا ریکارڈ اپنے نام کیا تھا۔ اس سے قبل یہ اعزاز بابر اعظم کے پاس تھا، جنہوں نے 49 گیندوں پر سنچری بنائی تھی، جبکہ حسن نواز نے یہ کارنامہ محض 44 گیندوں میں سرانجام دیا۔ ان کی شاندار اننگز میں 10 چوکے اور 7 چھکے شامل تھے۔
والدین کا اظہارِ مسرت
اے آر وائی نیوز سے گفتگو کرتے ہوئے حسن نواز کی والدہ نے کہا کہ “صبح سے بچوں کو دعائیں کرنے مسجد بھیجا ہوا تھا، بیٹے کو کرکٹ سے جنون کی حد تک پیار ہے، اسی لیے وہ کامیاب ہوا۔”
حسن نواز کے والد کا کہنا تھا کہ “ہم پسماندہ علاقے کے لوگ ہیں، یہاں سے انٹرنیشنل کرکٹر کا آنا بہت بڑی بات ہے۔ اللہ نے ہمیں عزت دی ہے۔”
Leave a Reply