ریاض: سعودی عرب نے اڑنے والی کاروں (فلائنگ کارز) کی تیاری کے لیے 30 ملین ڈالر کی سرمایہ کاری کا اعلان کیا ہے۔ اس مقصد کے لیے امریکی کمپنی ڈورونی ایرو اسپیس کے ساتھ معاہدہ کیا گیا ہے، جس کے تحت جدید HX-1 ای وی ٹی او ایل (eVTOL) ایئرکرافٹ کی تیاری کو تیز کیا جائے گا۔
HX-1 ایک دو نشستوں پر مشتمل برقی ہوائی گاڑی ہوگی، جسے گھر پر چارج کیا جا سکے گا، گیراج میں آسانی سے پارک کیا جا سکے گا، اور یہ عمودی انداز میں اڑنے کی صلاحیت رکھتی ہوگی۔
یہ معاہدہ سعودی کمپنی Innovation Wings Industries (IWI) کے ذریعے طے پایا ہے، جو Kingdom Aero Industries (KAI) کے نام سے کام کر رہی ہے۔
ڈورونی ایرو اسپیس کے سی ای او ڈورون میرڈنگر کے مطابق HX-1 فلائنگ کار 2026 تک مارکیٹ میں متعارف کرانے کا ہدف ہے، جبکہ سعودی عرب میں 2027 سے اس کی تیاری کا آغاز ہوگا۔
یہ 30 ملین ڈالر کی سرمایہ کاری دو مراحل میں کی جائے گی: ابتدائی طور پر 5 ملین ڈالر فوری فراہم کیے جائیں گے، جبکہ بقیہ 25 ملین ڈالر آئندہ دو سال میں اہم اہداف حاصل ہونے پر دیے جائیں گے۔ معاہدے کے تحت KAI کمپنی کو ڈورونی میں 40 فیصد حصص ملیں گے۔
یہ منصوبہ سعودی عرب کے ویژن 2030 کا حصہ ہے، جس کا مقصد معیشت کو تیل پر انحصار سے ہٹا کر جدید ٹیکنالوجی میں سرمایہ کاری کے ذریعے فروغ دینا ہے۔
Leave a Reply